کاش گئده گلمیه بو سینمه بیرده نفسیم

چوخ قارانلیقدی قفس چیخدی جانیم باتدی سسیم

کاش کی زینداندادا یالقیزلیقا بیر درمان اولا

واردی نه دردیمه درمان نه ده بیر دادرسیم

بیر گوشه ی ویرانه ده ویران کونوله

اوخشوری زیندانا آز چوخ بو داراشلیق قفسیم

دویموشام بو یاشاماقدان نفسیم سایه دوشوب

بویوموش گر یاشاماق ایسته میرم اولدو بسیم

یولونوب قول قانادیم سانکی سینیب بال و پریم

قالدی سینم ده گوزل آرزیلاریم خوش هوسیم

هر کسین اولماسا امیدی حایاتندا بوراخ

دئمه بیهوده یئره من نه روادیر تله سیم

هئچ منی قورخودا بیلمز نه شکنجه نه اولوم

سویودون یاپراقی تک بس نیه هر یلدن اسیم

قفسیم اولسادا پولاد گرکدیر چالیشام

دیرناغیم یا کی دیشیمله اونو همت له کسیم

بو قارانلیق گئجه گئدمک له قفس لر سیناجاق

گتیرر مژده (هادی ) آ بو سحر گلسه نسیم

                                                        استاد نصیر پایه گذار